Saturday, September 28, 2013

မလေးတွင် ဖမ်းဆီးခံ မြန်မာနိုင်ငံသားများအတွက် သံရုံး အကူအညီလိုအပ်




မလေးရှားမှာ ဖမ်းဆီးခံထားရတဲ့ မြန်မာနိုင်ငံသားတွေအတွက် သံရုံးရဲ့ အကူအညီတွေ လိုအပ်နေတယ်လို့ မလေးရှားရောက် မြန်မာ့လူမှုရေးအဖွဲ့အစည်းတွေက ပြောပါတယ်။
မလေးရှားနိုင်ငံမှာ တရားမ၀င်နေထိုင်မှုကြောင့် ဖမ်းဆီးခံထားရတဲ့ ရာနဲ့ချီတဲ့ မြန်မာနိုင်ငံသားတွေအတွက် နိုင်ငံသားဖြစ်ကြောင်း အထောက်အထားထုတ်ပေးဖို့ မလေးရှားနိုင်ငံဆိုင်ရာ မြန်မာသံရုံးရဲ့ အကူအညီ လိုအပ်နေတယ်လို့ မလေးရှားက မြန်မာ ရွှေ့ပြောင်းအလုပ်သမား ကူညီစောင့်ရှောက်ရေးစင်တာ (MMRC)က ပြောပါတယ်။

အဖမ်းဆီးခံထားရသူတွေထဲမှာ လွတ်ငြိမ်းချမ်းသာခွင့် ခေါ် ဆစ်ပီအစီအစဉ်နဲ့ မလေးရှားအခြေစိုက် မဟာနန်းလုပ်ငန်းစုကုမ္ပဏီတို့လို ကြားဝင်ဆောင်ရွက်ပေးတဲ့ ကုမ္ပဏီတွေ ကနေတဆင့် မှတ်ပုံတင်ထားပေမယ့် အလိမ်ခံရပြီး အထောက်အထား မရတဲ့ မြန်မာနိုင်ငံသားတွေလည်း ပါဝင်နေတယ်လို့ ဆိုပါတယ်။
အဖမ်းခံထားရတဲ့ မြန်မာနိုင်ငံသားတွေကို နိုင်ငံသား ဟုတ်၊ မဟုတ် စိစစ်ပြီးတော့ အထောက်အထားတွေ ထုတ်ပေးဖို့လိုအပ်ပေမယ့် မြန်မာသံရုံးက ဆောင်ရွက်မပေးဘူးဘူးလို့ MMRCက ဦးရန်နိုင်ထွန်းက ပြောပါတယ်။

မဟာနန်းကုမ္ပဏီမှာ ဆစ်ပီအစီအစဉ်နဲ့ အထောက်အထားရဖို့ မလေးရှားရင်းဂစ်ငွေ ၃၀၀၀ ကျော် ပေးဆောင်ခဲ့ပေမယ့်လည်း အထောက်အထား မရဘဲ မလေးရှားရဲတွေရဲ့ ဖမ်းဆီးတာကို ခံရတဲ့ ဦးသန်းစိုးဦးကတော့ အဖမ်းခံရချိန်မှာ သူဌေးက မြန်မာသံရုံးကို အကူအညီတောင်းခံခဲ့ပေမယ့် မရဘဲ မလေးရှားရင်းဂစ်ငွေ ၁၅၀၀ နဲ့ လာရောက်ရွေးယူခဲ့တယ်လို့ ပြောပါတယ်။

မြန်မာသံရုံးရဲ့ အလုပ်သမားသံအရာရှိ ဦးစိုးဝင်းကတော့ သူအနေနဲ့ အလုပ်သမားကိစ္စကို အာရုံထား ဆောင်ရွက်ရတဲ့အတွက် အဖမ်းခံထားရတဲ့ မြန်မာနိုင်ငံသားတွေနဲ့ ပတ်သက်ပြီး သံရုံးရဲ့ ဆောင်ရွက်ပေးမယ့်အစီအစဉ်ကိုတော့ သံရုံးကသာ ဖြေကြားနိုင်လိမ့်မယ်လို့ ပြောပါတယ်။မလေးရှားနိုင်ငံဆိုင်ရာမြန်မာသံရုံးကို ဆက်သွယ်ခဲ့ပေမယ့် ဖုန်းကိုင် ဖြေဆိုခဲ့ခြင်း မရှိပါဘူး။

မြန်မာသမ္မတ ဦးသိန်းစိန်ကတော့ ဖမ်းဆီးခံထားရတဲ့ မြန်မာနိုင်ငံသားတွေကို အကူအညီ ပေးနိုင်ဖို့အတွက် အလုပ်သမားဝန်ကြီး ဦးဆောင်တဲ့အဖွဲ ၁ ဖွဲ့ကို မကြာသေးခင်ကပဲ မလေးရှားနိုင်ငံကို စေလွှတ်ခဲ့ပါတယ်။ မလေးရှားနိုင်ငံမှာ တရားမ၀င်နေထိုင်သူတွေကို အစိုးရတာဝန်ရှိသူတွေက အခုလဆန်းပိုင်း ကတည်းက စီမံချက်ချပြီး ဖမ်ဆီးနေရာမှာ မြန်မာနိုင်ငံသား ၅၅၅ ဦး အဖမ်းခံထားရတာဖြစ်ပါတယ်။

ခုလက်ရှိ အဖမ်းအဆီး ရပ်တန့်သွားပေမယ့်လည်း မလေးရှားရဲတွေစုပြီး မြန်မာနိုင်ငံ သားတွေကို ဖမ်းဆီးကာ ငွေတောင်းခံတာတွေလည်း ရှိနေဆဲ ဖြစ်တယ်လို့ မလေးရှားရောက်မြန်မာတွေက ပြောပါတယ်။ မလေးရှားမှာ တရားဝင်အလုပ်သမား ၃ သိန်းနဲ့ တရားမဝင်အလုပ်သမား ၄ သောင်း လောက်ရှိတယ်လို့ မလေးရှားဆိုင်ရာ မြန်မာသံရုံးရဲ့ ပြောကြားချက်အရ သိရပါတယ်။

မလေးရှားနိုင်ငံထုပ် သူရိယ သတင်းဂျာနယ်မှ ပြန်လည်မျှဝေပါသည်။

DVB TVNews
Ref: Nayzawlin1


0 Comment Box:

Post a Comment


 

Comment Box

Followers