Sunday, September 22, 2013

မြန်မာနိုင်ငံအတွင်း ရထားများပေါ်၌် ခရီးသည်များထံမှ ခိုး၊ ဆိုး၊ နှိုက် ဖြစ်စဉ်များ လစဉ်ဖြစ်ပွားနေ


မြန်မာနိုင်ငံအတွင်း ရထားဖြင့် ခရီးသွားလာနေသော ခရီးသွားများထံမှ ခိုး၊ ဆိုး၊ နှိုက်ဖြစ်စဉ်များ လစဉ်ဖြစ်ပွားနေကြောင်း မြန်မာနိုင်ငံ ရဲတပ်ဖွဲ့ ဌာနချုပ် ရထားရဲတပ်ဖွဲ့ရုံးမှ စက်တင်ဘာ ၂၁ ရက်တွင် သိရသည်။

ဖြစ်ပွားခဲ့သည့် မှုခင်းအရေအတွက် များအနက် ထက်ဝက်ခန့်၏ ကျူးလွန်သူများကို ဖမ်းဆီးရမိခြင်း မရှိသေးဘဲ စုံစမ်းစစ်ဆေးဆဲ အဆင့်သာ ရှိနေသေးကြောင်း သိရသည်။

ရထားပေါ်တွင် ၂၀၁၃ ခုနှစ် သြဂုတ် ၁ ရက်မှ ၃၁ ရက်အထိ ခိုး၊ ဆိုး၊ နှိုက် မှုခင်းဖြစ်စဉ် ငါးမှုဖြစ်ပွားခဲ့ပြီး သုံးမှုမှ ကျူးလွန်သူများကို ဖမ်းဆီးဖော်ထုတ် အရေးယူနိုင်ခဲ့ကြောင်း သိရှိရသည်။

ရထားဖြင့် ခရီးသွားလာနေသည့် ခရီးသွားများ ရထားပေါ်တွင် အိပ်ပျော်နေသည့် အချိန်များ၌ အများဆုံး ပစ္စည်းများ ခိုးခံရမှု ဖြစ်ပွားနေကြောင်း ဖြစ်ပွားခဲ့သည့် ဖြစ်စဉ်များအား လေ့လာသုံးသပ်ချက်အရ သိရသည်။

ဖြစ်စဉ်တစ်ခုမှာ ၂၀၁၃ ခုနှစ် သြဂုတ် ၂၅ ရက် နံနက် ၁၁ နာရီတွင် မြစ်ကြီးနား-မန္တလေး အမှတ် ၃၈ အစုန်ရထား မိုးကောင်းဘူတာသို့ ဆိုက်ရောက်စဉ် မလဲ့လဲ့ထွန်း မိုးကောင်းမြို့နေသူနှင့် ၎င်း၏ခင်ပွန်း ကိုမင်းနိုင်ဦးတို့သည် အဆိုပါ ရထားရိုးရိုးတန်း အတွဲ ၂၊ ခုံအမှတ် ၄၅/၄၆ တွင် စီးနင်းလိုက်ပါလာစဉ် မလဲ့လဲ့ထွန်းမှ မိန်းမကိုင် သားရေဘေးလွယ်အိတ် (အနက်ရောင်) ငွေနှင့် ပစ္စည်းကာလတန်ဖိုး ကျပ် ၅၉၄၀၀၀၀ ခန့်အား ခေါင်းအုံးအိပ်ခဲ့ကြောင်း သိရသည်။

၂၆ ရက် နံနက် ၁ နာရီတွင် ကန့်ဘလူမြို့နယ် ထန်းကုန်းဘူတာ အ၀င်တွင် အမည်မသိ အမျိုးသားတစ်ဦးမှာ ဆွဲယူခုန်ဆင်း သွားခဲ့သဖြင့် ကန့်ဘလူ ရဲစခန်း (ပ)၃၀၆/၁၃ ပြစ်မှု ပုဒ်မ-၃၇၉ (နှိက်)ဖြင့် အမှုဖွင့် စစ်ဆေးနေကြောင်း သိရှိရသည်။

သြဂုတ်လအတွင်း ရထားပေါ်၌ ဖြစ်ပွားခဲ့သည့် ခိုးဆိုးနှိုက်မှုခင်း ဖြစ်စဉ်များကို ကောလင်းရဲစခန်း၊ ဟသာင်္တ ရထားရဲစခန်း၊ ရန်ကုန် ရထားရဲစခန်း၊ ရွာထောင် ရထားရဲစခန်းနှင့် မန္တလေး ရထားရဲစခန်းတို့က အမှုဖွင့် စစ်ဆေးနေကြောင်း သိသည်။




Eleven Media Group 

0 Comment Box:

Post a Comment


 

Comment Box

Followers