Tuesday, September 24, 2013

ကမ္ဘာ့အကြီးဆုံး စားသောက်ကုန်လုပ်ငန်းစု Nestle မြန်မာတွင် စက်ရုံတည်ထောင် ရင်းနှီးမြှုပ်နှံခွင့် ရရှိ

 
ကမ္ဘာကျော် Unilever စားသောက်ကုန် လုပ်ငန်းစုသည် မြန်မာနိုင်ငံတွင် စက်ရုံတည်ထောင်ပြီး လုပ်ငန်းစတင် လည်ပတ်နေချိန်တွင် ကမ္ဘာအကြီးဆုံး စားသောက်ကုန် ထုတ်လုပ်ရေုးလုပ်ငန်းစု Nestle ကလည်း မြန်မာနိုင်ငံတွင် စားသောက်ကုန်များ ထုတ်လုပ်ရောင်းချရန် စက်ရုံတည်ဆောက်ခွင့်ကို MIC (မြန်မာနိုင်ငံ ရင်းနှီးမြှုပ်နှံမှုကော်မရှင်) ထံမှ ခွင့်ပြုချက်ရရှိခဲ့ပြီးဖြစ်ကြောင်း ကုမ္ပဏီက ၂၁.၉.၂၀၁၃ ရက်တွင် ထုတ်ပြန် ကြေညာလိုက်သည်။ 

ဆွစ်ဇာလန် အခြေစိုက် Nestle သည် ကမ္ဘာပေါ်တွင် နိုင်ငံပေါင်း ၈၆ နိုင်ငံ၌ စက်ရုံပေါင်း ၄၅၀ အထိ ဖွင့်လှစ်ထားပြီးဖြစ်ကာ လုပ်သား ၃၂၈၀၀၀ ကို တိုက်ရိုက် အလုပ်ခန့်ထားနိုင်သည့် ကုမ္ပဏီဖြစ်ကာ မြန်မာနိုင်ငံတွင် ၄င်းတို့ရင်းနှီးမြှုပ်နှံမည့် စက်ရုံတွင်လည်း မြန်မာလုပ်သား ထောင်ချီပြီး အလုပ်ရစေမည်ဟု သိရသည်။ “စားသောက်ကုန် ထုတ်လုပ်ရေး ကုမ္ပဏီတွေ ဒီကို နင်းကန်ပြီး ဝင်လာတယ်ဆိုတဲ့ နေရာမှာ သူတို့က မြန်မာဈေးကွက် တစ်ခုတည်းကို ဦးတည်တာ မဟုတ်ဘူး။ မြန်မာက သန်း ၆၀ ကျော်ရှိတယ်။ အိန္ဒိယနှင့် တရုတ်က သန်း ၃၀၀၀ လောက်ရှိတယ်။ သူတို့က အဲဒီဘက်ကို ရည်ရွယ်နေတာ ဖြစ်နိုင်တယ်” ဟု ပြည်တွင်းရှိ နာမည်ရ စားသောက်ကုန် လုပ်ငန်းစုတစ်ခုမှ လုပ်ငန်းရှင်တစ်ဦးက သုံးသပ်ပြောကြားသည်။ မြန်မာနိုင်ငံတွင် Nestle ကော်ဖီမှာ လူတန်းစားတစ်ရပ်ကြားတွင် နာမည်ရပြီဖြစ်ပြီး Nestle လုပ်ငန်းစုအနေဖြင့် မြန်မာနိုင်ငံနှင့် ဈေးကွက်စိမ်းနေခြင်း မရှိကြောင်း သိရသည်။ 

Nestle မှ ထုတ်ပြန်ချက်တွင် မြန်မာနိုင်ငံထံမှ ၄င်းတို့၏ စက်ရုံတည်ဆောက်ခွင့်ပြုမည် ဖြစ်ကြောင်း အတည်ပြုချက်ကို ရရှိမည်ဖြစ်သည်ဟု ပြောကြားလာခြင်း ဖြစ်ကာ ၄င်းတို့၏ ထုတ်ကုန်မျိုးစုံကို မြန်မာဈေးကွက်တွင် တိုးမြှင့်ဖြန့်ချိတော့မည်ဟု သိရပြီး စက်ရုံရင်းနှီးမြှုပ်နှံမည့် ပမာဏကို ထုတ်ဖော်ပြောကြားလာခြင်း မရှိသေးကြောင်း သိရသည်ဟု ၂၀၁၃ ခုနှစ် စက်တင်ဘာလ ၂၆ ရက်နေ့ထုတ် ပြည်မြန်မာ ဂျာနယ်တွင် ဖော်ပြထားပါသည်။ 

ခေတ်လူငယ်

 

0 Comment Box:

Post a Comment


 

Comment Box

Followers