Saturday, October 5, 2013

KIA တပ်ဖွဲ့ဝင်များ ၀င်/ထွက် သွားလာလှုပ်ရှားမှု အဆမတန်များပြားလာ၍ ဒေသခံရှမ်းတိုင်းရင်းသားအချို့ နေရပ်များကို စွန့်ခွာ ထွက်ပြေးလျက်ရှိ


ကချင်ပြည်နယ် ဗန်းမော် - မဘိမ်း - မိုးမိတ် ကားလမ်းကြောင်း ၀ဲ/ယာ ရှိ ကျေးရွာများ၌ နေထိုင်ကြသော ဒေသခံရှမ်းတိုင်းရင်းသားအချို့သည် မန်စီမြို့နယ်တွင် ဖြစ်ပွားခဲ့သော တိုက်ပွဲများကြောင့် စက်တင်ဘာလကုန် မှစ၍ ကချင်လွတ်လပ်ရေးတပ်မတော် (KIA) တပ်ဖွဲ့ဝင်များ ၎င်းကျေးရွာများတစ်ဝိုက်၌ ၀င်/ထွက်သွားလာလှုပ် ရှားမှုအဆမတန် များပြားလာသဖြင့် နေရပ်များကို စွန့်ခွာထွက်ပြေးလျက်ရှိကြောင်း ယင်းဒေသခံအချို့ထံမှ သိရှိရသည်။

“ ဗန်းမော်မြို့ပေါ်ကို ပြေးလာတဲ့ မိသားစုတွေလည်းရှိတယ် ၊ အချို့ကတော့ ဗန်းမော်နဲ့ နီးတဲ့ ရွာတွေမှာ သွားပြီး နေကြတယ်လို့ သိရတယ်။ ဆွေးမျိုး တော်တဲ့ သူတွေလည်းရှိတာပေါ့၊ သူတို့ပြောတာကတော့ ရွာတွေမှာ ကချင်တပ်ကအဖွဲ့တွေ အများကြီး ၀င်/ထွက် နေလို့ တိုက်ပွဲဖြစ်မှာ ကြောက်ပြီး ပြေးလာကြတယ်လို့တော့ သိရပါတယ် ” ဟု မြို့ခံကျောင်း ဆရာမတစ်ဦးက ပြောပြသည်။

မန်စီမြို့နယ် ကောင်ဂျာကျေးရွာ၊ နမ့်လင်းပါကျေးရွာနှင့် စီခမ်းကြီး ကျေးရွာ တစ်ဝိုက်တွင် စက်တင်ဘာလကုန် ပိုင်းက KIA နှင့် နယ်မြေခံအစိုးရတပ်တို့ တိုက်ပွဲဖြစ်ပွားခဲ့ပြီးနောက် ဗန်းမော် - မဘိမ်း - မိုးမိတ် ကားလမ်းကြောင်း ၀ဲ၊ယာ ရှိ မံလင်၊ သံတံတား၊ စီကော် ၊ စီခမ်းကြီး၊ မွန်ဆင့်၊ ခါချဉ်း၊ ကမ်းနီ၊ ကောင်လွန်၊ မိုးနောင် ကျေးရွာများမှ ဒေသခံရှမ်းတိုင်းရင်းသားများမှာ KIA တပ်ဖွဲ့ဝင်များ အဆမတန် ၀င်/ထွက်သွားလာ လှုပ်ရှားလာမှုကြောင့် တိုက်ပွဲများဖြစ်ပွားလာမှာကို စိုးရိမ်ပြီး ထွက်ပြေးလာကြခြင်း ဖြစ်ကြောင်း သိရသည်။

“ ကားလမ်းကြောင်း ဘေးဘယ်ညာမှာက ရှမ်းရွာတွေများတယ်၊ အစိုးရ စစ်တပ်ကလည်း ၀င်/ထွက်တာတွေရှိ သလို KIA ဘက်ကလည်း အင်အား အများကြီး တိုးလာတာတွေ့တယ်၊ တကယ်လို့ တိုက်ပွဲတွေဖြစ်ရင် ငါတို့ အသက်အန္တရာယ်အတွက် စိုးရိမ်ရတယ်၊ ဒါကြောင့် ပြေးလာကြတာ၊ ပစ္စည်းတွေတော့ အကုန်ယူမလာနိုင်ဘူး ” ဟု ဗန်းမော်မြို့သို့ ရောက်ရှိ လာသော သံတံတားရွာသား ရှမ်းတိုင်းရင်းသားတစ်ဦးဆီမှ သိရှိရသည်။

“ KIO နဲ့ အစိုးရအဖွဲ့ ငြိမ်းချမ်းရေး ဆွေးနွေးပွဲရှိလို့ အခုလို အင်အားတွေများများချထားတာလည်း ဖြစ်နိုင်ပါတယ်။ ဒါတွေကို ဒေသခံတွေက ဘယ်နားလည်မလဲ၊ လူများများ သေနတ်တကားကားနဲ့ မြင်ရင် တိုက်ပွဲဖြစ်မှာပဲလို့ သူတို့က ထင်နေကြတာ၊ အခုလောလောဆယ် အဲဒီရွာတွေမှာ ကချင်လူမျိုးလောက်ပဲ ကျန် ခဲ့တယ်လို့ ပြောတယ် ၊ ရှမ်းတွေကတော့ အကုန်လုံးနီးပါး ပြေးလာကြတယ်၊ တိုက်ပွဲတွေ မဖြစ်ဖို့ ဒေသခံ အားလုံးက တောင်းဆိုနေချင်နေကြတာပါ ”ဟု ဗန်းမော်မြို့ခံ အစိုးရဌာနဆိုင်ရာ ၀န်ထမ်းတစ်ဦးက ပြောပြသည်။

ကချင်လွတ်မြောက်ရေးအဖွဲ့ (KIO) နှင့်အစိုးရ ငြိမ်းချမ်းရေးဖော်ဆောင်ရေး အဖွဲ့တို့သည် အောက်တိုဘာ (၈) ရက်မှ (၁၀) ရက်အထိ ပြည်ထောင်စု အဆင့် ငြိမ်ချမ်းရေးဆွေးနွေးပွဲကို ကျင်းပပြုလုပ်ရန် အကြိုတွေ့ဆုံ ဆွေးနွေးကာ သဘောတူညီမှု ရရှိထားပြီး ဖြစ်ပါသည်။


                                                                                               စိုင်းအောင်


                                                                                              Kachin Daily News



0 Comment Box:

Post a Comment


 

Comment Box

Followers