Saturday, October 12, 2013

ရာထူးမတိုးခြင်းနှင့် လစာနည်းမှုကြောင့် ကျောင်းဆရာများအလုပ်ထွက်မှုပိုများလာ

 
အရာရှိရာထူးအဆင့်ကို အလွယ်တကူမရရှိခြင်းနှင့် လစာနည်းပါးမှုများကြောင့် အမျိုးသားကျောင်း ဆရာများ အလုပ်ထွက်ကြခြင်းဖြစ်ကြောင်း အခြေခံပညာအသိုင်းအဝိုင်းမှ သိရသည်။
ယခင်ကဆရာ၊ ဆရာမများအနေဖြင့် အသက် ၄၅ နှစ်၊ ၅၀ နှစ်ခန့်ရှိလာပါမှ အရာရှိအဆင့်ကို ခံစားခွင့် ရှိခဲ့ကြောင်း SAT, ATEO, နှင့် အလယ်တန်းကျောင်းအုပ်များသည် လစာတန်းတူရရှိခဲ့ကြောင်း၊ အရာ ရှိအဆင့်ကို နှစ်တိုအတွင်း ခံစားခွင့်မရှိခဲ့ကြောင်း သိရသည်။

ယင်းနှင့်ပတ်သက်၍ ပေါင်းတည်မြို့နယ်မှ အလယ်တန်းကျောင်းအုပ် ဦးတင်ခိုင်ညွန့်က "အလယ်တန်း ကျောင်းအုပ်တွေအနေနဲ့ အရာရှိအဆင့်ရဖို့မလွယ်ဘူး။ လစာကလဲ ကွာတယ်လေ။ အဲဒီတော့ အလုပ် ထွက်ကြတယ်။ ဒါက ရာနှုန်းပြည့်မဟုတ်ပေမယ့် ဖြစ်နိုင်ခြေရှိပါတယ်" ဟု ပြောသည်။
အမျိုးသားကျောင်းဆရာများအနေဖြင့် လစာနည်းပါးမှု၊ အရာရှိအဆင့်ရာထူးရရှိရန် ဆယ်စုနှစ်ခန့် စောင့်ဆိုင်းရသောကြောင့် အလုပ်ထွက်ကြပြီး အခွင့်အလမ်းပိုမိုရရှိသည့် နေရာများသို့ ပြောင်းရွှေ့လုပ် ကိုင်လာကြကြောင်း၊ ယခုအခါ ပညာရေးကောလိပ်တွင် ဆရာ၊ ဆရာမခေါ်ယူရာတွင် အမျိုးသမီး ဆရာမလျှောက်ထားမှု များပြားသောကြောင့် အမျိုးသားကျောင်းဆရာများအတွက် ဝင်ခွင့်ရရှိရန် အခွင့်အရေးများလာကြောင်း သိရသည်။

ပညာရေးစီမံကိန်းနှင့် လေ့ကျင့်ရေးဦးစီးဌာနမှ တာဝန်ရှိသူတစ်ဦးက "အမျိုးသားကျောင်းဆရာတွေ နည်းပါးလာတာ မှန်ပါတယ်။ အဲဒါကြောင့်လဲ ဝန်ကြီးဌာနအနေနဲ့ လစာတိုးပေးတာတို့၊ ဆရာတွေရဲ့ ကျန်းမာရေးစောင့်ရှောက်မှု၊ နေရာထိုင်ခင်းပေးတာတို့ လုပ်ပေးရင် ဆရာတွေအနေနဲ့ ဒီအလုပ်ကို စိတ်ဝင်စားလာမယ်လို့ ထင်တယ်။ ဒီကိစ္စကိုလဲ အစီအစဉ်လေးတွေဆွဲပြီး အကောင်အထည်ဖော်ဖို့ တော့ဆွေးနွေးနေပါပြီ" ဟုပြောသည်။

ဝန်ကြီးဌာနအနေဖြင့် ဝေးလံခေါင်ဖျားဒေသများတွင် တာဝန်ထမ်းဆောင်နိုင်ရန် ဆရာ၊ ဆရာမများခေါ် ယူလျက်ရှိရာ အမျိုးသားကျောင်းဆရာများကို ဦးစားပေးခေါ်ယူလျက်ရှိကြောင်း လစာနှစ်ဆ ခံစားခွင့် ရှိနေသော်လည်း လက်ရှိတွင်အမျိုးသားကျောင်းဆရာ အရေအတွက်မှာ အမျိုးသမီး ကျောင်းဆရာ အရေအတွက်ထက် သုံးပုံတစ်ပုံခန့်မျှသာရှိနေကြောင်း သိရသည်။

အ.ထ.က (၂) ဒဂုံမှ ကျောင်းအုပ်ဆရာကြီး ဦးအေးသင်းက ပြောပြရာတွင် "အရင်တုန်းက အထက် တန်းကျောင်းအုပ်တစ်ဦး အရာရှိအဆင့်ရဖို့ဆိုရင် နှစ် ၃၀လောက်စောင့်ခဲ့ရတယ်။ အဲဒီလောက် ဆယ်စုနှစ်အချိန်ကိုစောင့်ဆိုင်းပြီးမှ ပြန်တမ်းဝင်အရာရှိဆိုတာဖြစ်တာ။ အမျိုးသားကျောင်းဆရာတွေ အလုပ်ထွက်တယ်ဆိုတာ လစာနည်းလို့လဲပါတယ်" ဟုပြောသည်။
မြန်မာတွင် အခြေခံပညာဆရာ၊ ဆရာမပေါင်း နှစ်သိန်းရှစ်သောင်းကျော်ရှိသည်။

                                                                                   The Yangon Times Daily
                                                                   အတွဲ(၁)၊ အမှတ်(၁၃၉)၊ အောက်တိုဘာ ၉၊ ၂၀၁၃
                                                                                  REF: မောက္ခ


 


0 Comment Box:

Post a Comment


 

Comment Box

Followers